BEMORLIK (BEMORIY) Ibn Sirin (r.a.)ning aytishicha, har kim tushida bemor ekanini ko‘rsa, diniy ishlari nuqsonli, odamlar bilan bo‘ladigan muomalasi munofiqona ekanini bildiradi. Ba’zilarning aytishicha, o‘sha yili o‘ladi. Agar kasallikdan tuzalganini ko‘rsa, o‘z uyida bo‘lmasa, hech kim bilan so‘zlashmasa kasalligi uzoqqa cho‘zilishi, xatto o‘lim xatarining ehtimoli borligiga dalildir. Ammo odamlar bilan o‘tirganini va so‘zlashayotganini ko‘rsa, kasallikdan tezda shifo topishini bildiradi.
Kirmoniy (r.a.) aytadiki, kasallikda yalang‘och ekanini ko‘rsa, tez o‘lishiga dalildir. Ta’birchilarning aytishlaricha, tushdagi kasallik fisqu fujur hamda podshoh yoki ayol tomonidan yetadigan g‘amu anduhni bildiradi.
Jobir Mag‘ribiy (r.a.) aytishicha, tushdagi har xil kasalliklar, farzlar va sunnatlarning xor bo‘lishiga dalil bo‘ladi.
Ja’far Sodiq (r.a.)ning aytishlaricha, tushida bemor bo‘lganligini va illatdan nola chekayotganini ko‘rsa, g‘amdan emin bo‘lishiga dalildir. Agar kasallikda qanoatli, rozi va shukr qiluvchi bo‘lsa, ta’biri yaxshilik va salomatlikka dalil bo‘ladi. Agar kasal bo‘lgani va yalang‘och ekanini ko‘rsa, ajali yaqin qolganini bildiradi.